Mat 26 | NdeIBE | STEP | UJesu eseqedile ukukhuluma zonke lezi izinto, wathi kubafundi bakhe,

Matthew 26

Icebo Elibi NgoJesu

1 UJesu eseqedile ukukhuluma zonke lezi izinto, wathi kubafundi bakhe,

2 “Njengoba lisazi, sekusele izinsuku ezimbili ukuba iPhasika lifike – njalo iNdodana yoMuntu izanikelwa ukuba ibethelwe.”

3 Kwathi abaphristi abakhulu labadala babantu baqoqana esigodlweni somkhulukhulu wabaphristi obizo lakhe lalinguKhayifasi,

4 baceba ukubopha uJesu ngobuqili bambulale.

5 Bathi, “Kakungabi ngesikhathi seDili funa kube lesiyaluyalu ebantwini.”

UJesu Uyagcotshwa EBhethani

6 Kwathi uJesu eseBhethani endlini yendoda eyayithiwa nguSimoni uMlephero, 7 kweza kuye owesifazana ephethe umfuma wamakha adula kakhulu wawathela ekhanda likaJesu owayeyeme etafuleni.

8 Abafundi bathi bekubona lokho bacasuka. Bathi, bebuza, “Adlaliselwani kanje na?

9 Amakha la abengathengiswa ngemali ephezulu leyomali iphiwe abampofu.”

10 UJesu esekunanzelele lokhu wathi kubo, “Limkhathazelani owesifazana lo na? Wenze into enhle kimi. 11 Abampofu lizahlala lilabo kokuphela, kodwa kalisoze libe lami kokuphela.

12 Uthe ethululela amakha la emzimbeni wami ubesenzela ukungilungiselela ukungcwatshwa.

13 Ngiqinisile ngithi langaphi lapho okuzatshunyayelwa ivangeli leli emhlabeni wonke, lokhu akwenzileyo kuzakhunjulwa, kube yisikhumbuzo ngaye.”

UJudasi Uvuma Ukunikela UJesu

14 Kwathi omunye wabaliTshumi lambili – lowo owayethiwa nguJudasi Isikariyothi – waya kubaphristi abakhulu 15 wabuza wathi, “Lizangiphani uma ngimnikela kini?” Base bembalela izinhlamvu zesiliva ezingamatshumi amathathu. 16 Kusukela khonapho uJudasi wadinga ithuba lokuba amnikele.

Isidlo SeNkosi

17 Ngosuku lokuqala lweDili leSinkwa Esingelamvubelo abafundi beza kuJesu bambuza bathi, “Ufuna sikulungisele ngaphi ukuthi udlele khona iPhasika na?”

18 Waphendula wathi, “Ngenani edolobheni komunye umuntu limtshele lithi, ‘UMfundisi uthi: Isikhathi sami esimisiweyo sesiseduze. Ngizakudla iPhasika labafundi bami endlini yakho.’ ” 19 Yikho abafundi benza njengokulayelwa kwabo nguJesu balungisa iPhasika.

20 Kwathi kusihlwa uJesu wayehlezi eyeme etafuleni elabaliTshumi lambili.

21 Kwathi besidla wathi, “Ngilitshela iqiniso ukuthi omunye wenu uzanginikela.”

22 Badana kakhulu basebesithi kuye ngamunye, “Ngeqiniso kakusimi, Nkosi, kambe?”

23 UJesu waphendula wathi, “Lowo otshebe kanye lami emganwini uzanginikela. 24 INdodana yoMuntu kwenzakala kuyo njengoba kulotshiwe ngayo. Kodwa maye kulowomuntu ozanikela iNdodana yoMuntu! Bekungaba ngcono kuye ngabe wayengazalwanga.”

25 Wasesithi uJudasi, lowo owayezamnikela, “Kambe sibili, kungaba yimi na, Rabi?” UJesu waphendula wathi, “Yebo, nguwe okutshoyo.”

26 Bathi besadla uJesu wathatha isinkwa wabonga, wasihlephula wasipha abafundi bakhe esithi, “Thathani lidle; lokhu kungumzimba wami.”

27 Wasethatha inkomitshi wabonga, waseyedlulisela kubo esithi, “Nathani kuyo lonke. 28 Leli ligazi lami lesivumelwano elichithelwe abanengi ukuthethelelwa kwezono.

29 Ngiyalitshela angisayikuphinda ngisinathe lesisithelo sevini kusukela manje kuze kube yilolosuku lapho engizalinatha kabutsha lani embusweni kaBaba.”

30 Bathi sebehlabele ihubo baphuma baya eNtabeni yama-Oliva.

UJesu Ubonisa Ngokuphika KukaPhethro

31 UJesu wasebatshela wathi, “Ngabona lobu ubusuku lizakwenyela ngami, ngokuba kulotshiwe ukuthi: “ ‘Ngizatshaya umelusi kuthi izimvu zomhlambi zichitheke.’

32 Kodwa nxa sengivukile ngizalandulela eGalile.”

33 UPhethro waphendula wathi, “Loba bonke bangaze benyele ngenxa yakho, mina kimi kungazake kwenzeke.”

34 UJesu waphendula wathi, “Ngikutshela iqiniso ukuthi ngabonalobu ubusuku, iqhude lingakakhali uzangiphika kathathu.”

35 Kodwa uPhethro wala wagomela wathi, “Loba kungaze kube ngizakufa lawe, ngeke lanini ngikuphike.” Abanye abafundi bonke labo batsho khonokho.

EGetsemane

36 UJesu wasehamba labafundi bakhe endaweni eyayithiwa yiGetsemane, wasesithi kubo, “Hlalani lapha, mina ngisaya laphayana ukuyakhuleka.”

37 Wathatha uPhethro lamadodana womabili kaZebedi wahamba labo, waseqalisa ukuhlulukelwa lokukhathazeka. 38 Wasesithi kubo, “Umphefumulo wami ugajelwa lusizi kuze kuthi ngife. Hlalani lapha lilinde lami.”

39 Wahamba ibanganyana, wasezilahla phansi wathi mbo ngobuso wakhuleka wathi, “Baba, uma kungenzeka, sengathi inkomitshi le ingasuswa kimi. Kodwa akungabi ngokuthanda kwami, kodwa kube ngokuthanda kwakho.”

40 Wasebuya kubafundi bakhe wabafica sebelele. Wabuza uPhethro wathi, “Lina madoda kambe kulehlule ukulinda kanye lami okwehora elilodwa nje? 41 Lindani likhuleke ukuze lingaweli ekulingweni. Umoya uyathanda kodwa umzimba ubuthakathaka.”

42 Wahamba njalo okwesibili wakhuleka wathi, “Baba, nxa kungenzeki ukuthi inkomitshi le isuswe ngaphandle kokuthi ngiyinathe, kayenziwe intando yakho.”

43 Wathi esebuya wabafica njalo sebelele, ngokuba amehlo abo ayenzima. 44 Ngakho wasebatshiya waphinda wahamba njalo wayakhuleka okwesithathu ephinda into yinye.

45 Wasebuyela kubafundi wathi kubo, “Lilele, liyaphumula na? Khangelani, isikhathi sesisondele, iNdodana yoMuntu isizanikelwa ezandleni zezoni. 46 Phakamani sihambe! Nangu usesiza onginikelayo.”

Ukubotshwa KukaJesu

47 Wathi esakhuluma, uJudasi, omunye wabaliTshumi Lambili wafika. Wayehamba lexuku elikhulu lihlomile ngezinkemba lezinduku lithunywe ngabaphristi abakhulu labadala babantu. 48 Omnikelayo wayelungisile labo isiboniso wathi: “Lowo engizamanga nguye; mbopheni.” 49 UJudasi wahle waya kuye wathi, “Sabona, Rabi!” wamanga.

50 UJesu waphendula wathi, “Mfowethu, yenza lokho okulandileyo.” Asesondela amadoda, amdumela uJesu ambopha.

51 Khonapho omunye wabaphelekezeli bakaJesu wakhokha inkemba yakhe wagalela inceku yomphristi ophezulu wayiquma indlebe.

52 UJesu wathi kuye, “Buyisela inkemba yakho endaweni yayo, ngoba bonke abakhokha inkemba bazakufa ngenkemba. 53 Ucabanga ukuthi ngingaze ngacela kuBaba, masinyane nje angiphe amaviyo alitshumi lambili ezingilosi?

54 Kodwa phela ibingagcwaliseka kanjani imiBhalo ethi kumele kwenzeke ngale indlela na?”

55 Khonapho uJesu wathi exukwini labantu, “Kanti ngikhokhela umvukela yini lize lihlome ngezinkemba lezinduku ukuzangibamba na? Izinsuku zonke ngangihlala emagumeni ethempeli ngifundisa, kodwa kalingibophanga.

56 Kodwa lokhu kwenzeke ukuze kugcwaliseke imibhalo yabaphrofethi.” Khonapho abafundi bonke bamtshiya babaleka.

Phambi KweSanihedrini (Umphakathi)

57 Labo abambophayo uJesu bamusa kuKhayifasi, umphristi ophezulu, lapho okwasekubuthene khona abafundisi bomthetho labadala.

58 Kodwa uPhethro wayemlandela ehambela kude waze wayangena egumeni lomphristi ophezulu. Wangena wahlala phansi lamanxusa efuna ukubona okwakuzakwenzakala.

59 Abaphristi abakhulu leSanihedrini yonke babedinga ubufakazi bamanga ngoJesu ukuze bambulale. 60 Kodwa babuswela, lanxa abanengi ofakazi bamanga bavela. Ekucineni ababili beza phambili 61 bathi, “Umfokazi lo wathi, ‘Ngilamandla okulidiliza ithempeli likaNkulunkulu ngiphinde ngilakhe kutsha ngezinsuku ezintathu.’ ”

62 Umphristi ophezulu wathi lothu wathi kuJesu, “Kawuphenduli kanti na? Kuyini kanti lokhu okufakazwa yila madoda ngawe na?”

63 Kodwa uJesu wala elokhu ethule. Umphristi ophezulu wathi kuye, “Ngiyakulaya, ngimfunga uNkulunkulu ophilayo ngithi: Sitshele ingabe unguKhristu, iNdodana kaNkulunkulu.”

64 “Yebo,” kuphendula uJesu. “Kunjengoba usitsho. Kodwa ngithi kini lonke: Ngesikhathi esizayo lizayibona iNdodana yoMuntu ihlezi kwesokunene sikaMninimandla isehla ngamayezi ezulwini.”

65 Khonapho umphristi ophezulu waklebula izigqoko zakhe wathi, “Usehlambazile! Sisafunelani abanye ofakazi na? Khangelani, manje likuzwile ukuhlambaza. 66 Lithini ngakho?” Baphendula bathi, “Ufanele ukufa.”

67 Basebemkhafulela emehlweni njalo bammuhluza ngenqindi. Abanye bammakala

68 bathi, “Phrofetha kithi, Khristu. Ngubani okutshayileyo?”

UPhethro Ulandula UJesu

69 UPhethro wayehlezi phandle egumeni, kwasekusiza kuye intombazana eyincekukazi yathi kuye, “Lawe njalo wawuloJesu waseGalile.”

70 Kodwa walandula phambi kwabo bonke. Wathi, “Angikwazi lokho okhuluma ngakho.”

71 Wasesuka ephuma entubeni lapho abonwa khona ngenye intombazana eyathi ebantwini khonapho, “Umfokazi lo wayeloJesu waseNazaretha.”

72 Walandula njalo efunga esithi, “Kangiyazi indoda leyo!”

73 Ngemva kwesikhatshana labo ababemi khonapho baya kuPhethro bathi, “Ngeqiniso ungomunye wabo, ngoba indlela okhuluma ngayo iyakuceba.”

74 Wasekhihliza iziqalekiso phezu kwakhe wafunga kubo wathi, “Angimazi mina lowomuntu!” Masinyane iqhude lakhala. 75 UPhethro waselikhumbula ilizwi elakhulunywa nguJesu esithi: “Iqhude lingakakhali uzangilandula kathathu.” Waphumela ngaphandle wakhala kabuhlungu.